A pëënya uuni nyïimera; a këël yiwäne nø noo jwöttu?

Uuna tïmö kamar cï-jwøk mo okulö dï paac,

Ni tïmu kamar tula mo weny böö ki gø.

Ut-tööc apäng ni ngööng-gi wøk,

Ni tïme ni man røømmø kigø jaak, maac gøaa dëëre kamar kul.

Dïcäng yï rëëmma wøk bäät tïïc ni ö Kebede ni kïthi kari,

Diyøø yï di cwølø ni ngwöny yïïni kamar nyilaal.

Cøku, omaru, owöru, wäru ki tuungu bëët atum ki thøø,

Ni ö møøki ni peedhi piny jöör jääy nee thurubïle rïïng-gi ki bäätgi

Ni ö møøga ni waangi ki maac ni kwøw nee rïïng-gi dï paac,

Ni jøw ngïërö ki gïrgi kaawat mana wara tïïc Rööm.

Mëë ki nyïïakuwöe man näk dëët cwøw kucgi, agøyi ki piny,

Ni nëënö jï nyïïmëëkgi ki jø paac bëët,

Ni ö Omøngngi ni ngeeli dëëtgi, nee thumgi ni gi thööra täwwi

Jur atwäädö bäätgi, “ni røøma dëëtu wang cängi,

U näänwa atöör nee bunge-gø mo dööng mo kootha maac,

Anywaa wïï dïdö waang cängi nø, nee ngøøpi camwa”.

Ngøøp kwaro ki dhi øt kwaro, wäru anø rïëm wøk yie,

Ni dööng jaalli ni kïmmö jaak, ni yie onithay ni bung gïn tïïë.

Apoole apïëö ni yïthgi othängngö, ni juni käl kaa ni reemwa en?

Angø cwøw, jur cäm ngø ki ngøøm noo nutø?

Ni løgi na jø døøngnge, “ni wa ba nut en di, da gïn di caanø,

Junøgø ba røøm kuthwa këët; røømi ko obwöre mo kööthgi poot teek.

Yï løgi ngø nø nye yï en paac en; ni løgi ngø nye yï ni en ngøøp wøk en?

Moa en paac na näk wäät paac, wïthgi awär thøøe ki tööc,

Ni ö møøga ni lwäcgi ki lwäny thøø ni dhøgi mo maal ki mo piny ba maargi tuuk,

Ni ö møøga ni cïpgi ceng-gi jï jur kiper ïthgi, ni tïmgi ni beegi jø näk tuung-gi ki bäätgi.

Ni ö moa en wøki ni ngeew møøk dëëtgi, ni taakgi thøø mana näga Anywaa kigø,

Ni köögi, “ni wïthø wïlgi ki thøø, dhaanhø wø thøw cøøn obëëde.           

A thøwwe ni wïl wïci kigø? A dhaanhø aciel ee wala arieø wala apaar?

Thøø mo dïïrra wï jur pa thøø mo wïc wïl kigø, beeye thøø mo wïc ba wïl kigø

Kiper ena thøø mo ba cuungngi mo jur okööng kigø.

‘Ba en nø, anguune ba aöö; yï poot kööy nidïï nø?

Jur ba anyöön bëëte ni di køø ki Anywaa ni nyiik kaace bø,

A kanyo thum ngøømmi, opoode ni jøw poot nyiiga kaae?

Awäre noo købi ni dwäätö jur ni cam piny ki dhar agööla en,

Jøw møøga köö ni gïnö gïr jø lul, gïnö gïr jø opëënö,        

Ni møøga köö,” ni aana dhaanh ngat, aana dhaanh ngati”,

‘Ba en nø, ba apïï ri dïïm mana näk bung cuungnge këët,

Agïne ni poot køøri bang jur noo beer noo poot tïïë jïri?

Nee beeye kwøw, yïïna nø thøw ni ö wï juni ni nø dïïri,

Nee beeye cam, bung cam këët jur ööma cam,

Gïno poot koori mo beer mo tïïc juri tïïö jïrï en kaa?

Nyïïmera, apëënya unni u bëët noo cättu ki cwïnyu,

Ni taaø luum cam, ki kwär gïn ni män øøni ki dwäätö en,

Ni wiiø lwär, ki taak røk ki wat maya, ki bung ngäth røk.

Angø Anywaa ocan ko oteeø a yiwäne cøøn?

Akway U Caam, ki Olïmi wa Akwøn gi kär cäätö bäre bäre?

Jaaga reem Nyïglïc na dööngu Ocumaale piny.

Age yi Omøt wär Ongwäc, ki Urubulu?

Jaaga teek na reem Jur ki leethki ki tøøngi.

Angø yi Anywaa otïmö ni bung cwøw yie yiwäne?

Otëë ngöömmögø amän-gi ki jur ki remø, ni mëëgi gø øøni,

Øøno cïbö ngø jïïu obwöre møø, ki beenhnhe mo ööy?

Kanyo pëëwu obwöre na awuuö paac akaae?

Ø løø ngø, ø loobø ngø jïgi?

Wïc laay… wïc laay, ba løny ki jøøl.

Öö maal ni løø pïïc mar apoole jïgi

Kär dee nine këët, dïcwø thøw na nguu,

Yïï ba thøw ni yï jääk ni cengngi ii joo dëëri,

Jur ba døø ngääë ki ngeethø wala ki kwaac røk,

Døøk ka gïn mo caanø jaay, ki opøøl wang pääk

Luubö man göör Ojulu Odola. Løng ki man joodi eni ki bäät ajääp man: Ojulu@optusnet.com.au